Þetta er voðalega fín vél, held ég a.m.k., DeLonghi heitir tegundin og er, hvað sem öðru líður, frá Ítalíu. Við erum meira að segja búin að útbúa kaffihorn í eldhúsinu og eru allar kaffigræjurnar þar, tilbúnar í tuskið.
Við helltum því upp á nokkra bolla í gær, en þessi vél er þeirrar náttúru gædd að vera bæði kaffivél upp á gamla móðinn og einnig expressóvél. Við Dagmar Ýr fengum okkur því þetta fína cappucino í gær, æðislega gott.
Vorum snobb fram í fingurgóma og gæddum okkur á einhverju dýrindis ítölsku kaffibrauði með. Nammi, namm.
Tinna Rut hins vegar er meira upp á gamla móðinn og hellti uppá „venjulegt“ kaffi og drakk með bestu lyst. Síðan gerði hún kaffivélina tilbúna í gærkveldi og kom upp eins og svefngengill um klukkan sex í morgun og kveikti á henni. Gat því fengið sér tíu dropa áður en haldið var í skólann.
En síðan get ég líka sagt frá því að í síðustu viku skráði ég mig á fjögurra vikna ljósmyndanámskeið. Þetta er fjarkennslunámskeið, betri myndir kallast vefsíðan. Þarna eru víst voðalega frægir ljósmyndarar að kenna okkur aulunum. Er boðið upp á nær óendanlegan fjölda af námskeiðum, en ég valdi námskeið sem snýr að uppstillingu á myndefninu. Líst mér vel á þetta og eyddi stórum hluta helgarinnar að taka myndir.
Hvernig tengist þetta kaffivélinni?
Jú, ég var í vandræðum með eitt verkefnið og ákvað því að prófa að notfæra mér nú nýlagaðan kaffibolla. Varð útkoman þessi:
Maður er víst svolítið sérstakur er manni sagt...
3 ummæli:
Flott og listræn mynd.
Kveðja,
Gulla
Er eitthvað vit í þessum námskeiðum? Er mikið að spá í svona byrjenda photosjopp námskeiði fyrir sjálfan mig. Er þetta 12 þús kr virði???
Eftir fyrstu vikunni að dæma, þá er mjög faglega staðið að námskeiðunum þarna. Munurinn á þessu og kennslubókum er að þarna er alvöru ljósmyndari sem gagnrýnir verkefnin og bendir á leiðir til úrbóta. Einn sem er með mér á námskeiðinu er á sínu sjötta námskeiði og er mjög ánægður. Ef þú hefur áhuga á ljósmyndun og myndvinnslu þá er þetta engin spurning í mínum huga.
Skrifa ummæli